मेस्सिले गोल गर्न नसक्दा – बार्सिलोना २० औ स्थानको इस्पानोयलसंग बराबरीमा रोकियो

काठमाडौं, पुस २० ,आइतबार
स्पेनिस ला लिगा फुटबलअन्तर्गत वर्ष २०२० को पहिलो खेलमा बार्सिलोना बराबरीमा रोकिएको छ । नेपाली समयअनुसार आइतबार बिहान भएको नयाँ वर्षको पहिलो तथा लिगको १९औं खेलमा बार्सिलोनालाई २०औं स्थानको इस्पान्योलले २–२ को बराबरीमा रोकिदिएको हो ।

पहिलो हाफमा पछि परे पनि दोस्रो हाफमा २ गोल गरेर खेलमा अग्रता लिएको बार्सिलोना अन्तिम केही मिनेट सम्हालिन नसक्दा महत्त्वपूर्ण २ अंक गुमाउन बाध्य भयो । बार्सिलोना खेलको ७५औं मिनेटमा १० खेलाडीमा झर्दाको फाइदा इस्पान्योलले उठायो ।

इस्पान्योलको घरेलु मैदानमा बार्सिलोनाले पहिलो हाफमा १–० ले पछि परेर दोस्रो हाफमा कमब्याक गरेको थियो । आफ्ना घरेलु दर्शकमाझ इस्पान्योलले खेलको २३औं मिनेटमा पाहुना टोली बार्सिलोनाविरुद्ध गोल गरेको थियो । मार्क रोकाले फ्रि किकमा हानेको बलमा डेभिड लोपेजले हेडिङमार्फत् सुन्दर गोल गरेका थिए । लोपेजेको फ्रि हेडरमा बार्सिलोनाका डिफेन्डर र गोलकिपरले बल रोक्न प्रयाससमेत गर्न भ्याएनन् ।

तर, दोस्रो हाफ सुरु हुनासाथ बार्सिलोना खेलमा फर्कियो । ५०औं मिनेटमा स्ट्राइकर  लुइस स्वारेजले जोर्डी अल्बाको पासमा लो टचमा बललाई पोस्टको दिशा दिएपछि खेल १–१ भयो । प्रशिक्षक अर्नेस्र्टो भाल्भर्डेले दोस्रो हाफको सुरुआतमै इभान राकिटिकको स्थानमा अर्टुरो भिडाललाई मैदान छिराएपछि बार्सिलोनाले घरेलु टोलीविरुद्ध आक्रमण बढाएको थियो ।

सब्सिच्युट खेलाडी भिडालले दोस्रो हाफमा बार्सिलोनाका लागि लिड गोल गरे । खेलको ५९औं मिनेटमा उनले लुइस स्वारेजको असिस्टमा पोस्ट नजिकैबाट सुन्दर हेडिङ गोल गरेपछि खेलमा बार्सिलोनाले १–२ को अग्रता बनायो ।तर, निर्धारित समयको अन्तिम १५ मिनेट बाँकी छँदा १० खेलाडीमा सीमित भएको पाहुना टोलीविरुद्ध इस्पान्योलले खेलको ८८औं मिनेटमा बराबरी गोल फर्कायो । हारनजिक पुगेका बेला सब्सिच्युट चिनियाँ खेलाडी वाऊ लेईले शानदार गोल गरेपछि २०औं स्थानको घरेलु टोलीले सम्भावित हार मात्रै टारेन, लिग लिडरलाई २–२ को बराबरीमा रोक्दै १ अंक पनि जोड्न सफल भयो ।

अब यो बराबरीसँगै बार्सिलोनाले अंक तालिकामा रियल मड्रिडसँग अग्रता बढाउने मौका पनि गुमाएको छ । लिगका १९ खेलपछि दुवै टोलीको समान ४०–४० अंक छ । तर, गोलअन्तरमा बार्सिलोना शीर्ष स्थानमा फर्किएको छ । यसअघि रियल मड्रिड आफ्नो खेलमा गेटाफेलाई ०–३ ले हराएर शीर्ष स्थानमा चढेको थियो । तर, इस्पान्योलसँगको खेलबाट १ अंक जोडेपछि बार्सिलोना शीर्ष स्थानमा फर्किन सफल भयो ।

प्रकाशित मिति २० पुष २०७६, आईतवार ०३:१६
Loading...