स्वारेज बार्सिलोना छाडेर अमेरिकन क्लब जाँदै

एजेन्सी, कात्तिक २२
सन् २०१४ देखि स्पेनिस बार्सिलोनाबाट खेलिरहेका उरुग्वेन फरवार्ड लुइस स्वारेजले निकट भविष्यमै बार्सिलोना छाडेर अमेरिकन लिगमा खेल्न जाने मनस्थिति बनाइरहेको उनका राष्ट्रिय टिमका सहकर्मीले खुलासा गरेका छन् । उरुग्वेको टिमबाट सँगै खेल्ने निकोलास लोडेरियाले आफ्ना सहकर्मीको भविष्यबारे बताएका हुन् ।

निकोलास हाल अमेरिकाको शीर्ष लिग खेल्ने क्लब सिटल साउन्डर्सबाट खेलिरहेका छन् । र, उनको टिमले शनिबार एमएलएस कपको फाइनलमा टोरोन्टो फुटबल क्लबसँग उपाधिका लागि भिड्दैछ । सो खेलअघि एक अन्तर्वार्तामा बोल्दै निकोलासले स्वारेज चाँडै अमेरिकन लिग खेल्न आउने बताए ।

‘मलाई थाहा छ, उनी एमएलएस आउन चाहन्छन्,’ निकोलासले भनेका छन्, ‘उनले मलाई सधैं अमेरिकन लिगबारे सोध्दै आएका छन् । उनलाई यस लिगबारे धेरै कुरा थाहा भइसकेको छ ।’

निकोसाले स्वारेजले कहिले बार्सिलोना छाड्न सक्छन् भन्नेबारे भने आफूले केही भन्न नसक्ने बताए । ‘यो त म भन्न सक्दिनँ । तर, यो उनको टिमको अवस्थामा भर पर्छ होला,’ निकोलासले भने, ‘व्यक्तिगत रूपमा मलाई लाग्छ, उनी २०२० बाटै पनि आउन सक्छन् । वा, त्यसको एक वर्षपछि । बार्सिलोनामा आफूलाई फिट लाग्न छाडेका दिन उनले स्पेन छाड्छन् ।’

निकोलासले स्वारेजजस्ता खेलाडी अमेरिकन लिगमा आउनु खुसीको कुरा भएको बताए । ‘यो टुंगो छैन । तर, यदि उनी यहाँ आए लिगको प्रतिष्ठा र महत्त्व थप बढ्नेछ,’ निकोलासले भने ।

स्वारेजलाई लिजेन्ड इंग्लिस खेलाडी डेभिड ब्याकहमले स्थापना गरेको क्लब इन्टर मियामीमा अनुबन्ध गर्न प्रयास गरिरहेका छन् ।

प्रकाशित मिति २२ कार्तिक २०७६, शुक्रबार १४:१०
Loading...